న్యూస్ 24అవర్స్ టివి-తిరుమల-తిరుపతి, 03.04.2025: తమ వ్యాపార అవసరాల కొరకు రియల్ ఎస్టేట్ వెంచర్ల వద్ద ఆలయాలు నిర్మిస్తున్న వాటి బాధ్యత ను టీటీడీ తీసుకోవాలని భావించడం అన్యాయమని ఈ వైఖరిని రాష్ట్ర ప్రభుత్వం తక్షణం ఉపసంహరించుకోవాలని సిఐటియు జిల్లా ప్రధాన కార్యదర్శి కందారపు మురళి ఓ ప్రకటనలో డిమాండ్ చేశారు. బుధవారం నాడు అమరావతిలో జరిగిన టిటిడి సమీక్ష సమావేశంలో చెన్నై కేంద్రంగా పని చేస్తున్న జి స్క్వేర్ అనే రియల్ ఎస్టేట్ సంస్థ తాను వెంచర్లు చేపట్టిన చోట టీటీడీ ఆలయాన్ని సొంత ఖర్చులతో నిర్మిస్తున్నందున దాని నిర్వహణ బాధ్యతను టీటీడీ తీసుకోవాలని రాష్ట్ర ముఖ్యమంత్రి ఆదేశించడం అసమంజసమైందని, ఈ రకమైన ధోరణితో పోతే దేశంలో అనేక వివాదాలకు కేంద్రంగా టిటిడి మారుతుందని, వ్యాపార అవసరాల కోసం వ్యక్తులు చేసే ఆలయాల నిర్మాణానికి టీటీడీ బాధ్యత వహించాల్సిన అవసరం లేదని కందారపు మురళి పేర్కొన్నారు. ఇప్పటికే దేశవ్యాప్తంగా కళ్యాణ మండపాలు నిర్మించి వాటి నిర్వహణ చేయలేక టీటీడీ చేతులెత్తేసిన విషయాన్ని ఆయన గుర్తు చేశారు. గతం లో కోడెల శివప్రసాద్ తన నియోజకవర్గంలో నిర్మించుకున్న కళ్యాణ మండపాన్ని టీటీడీ నిర్వహించలేక కేవలం నెలకు రూపాయి లీజుతో ప్రైవేటు వ్యక్తులకు ఇచ్చిన విషయాన్ని గుర్తు చేశారు. కళ్యాణ మండపాల నిర్వహణే చేతగాని పరిస్థితుల్లో ఉన్నప్పుడు, దేశంలో పలు చోట్ల ఆలయాలు నిర్మిస్తున్నారని వాటి నిర్వహణ కూడా ఇబ్బందికరమైందని, ఇవే కాకుండా ప్రైవేట్ వ్యక్తులు, రియల్ ఎస్టేట్ సంస్థలు చేపట్టే ఆలయాలను కూడా టీటీడీ బాధ్యత తీసుకోవాలనుకోవడం సమంజసం కాదని, తక్షణం ఈ అంశంపై పునరాలోచన జరపాలని కందారపు మురళి ఒక ప్రకటనలో కోరారు. టీటీడీలోని కాంట్రాక్టు, ఔట్సోర్సింగ్ కార్మికులు దశాబ్దాలుగా పనిచేస్తున్నారని వారి సమస్యల పరిష్కారంలో నిర్లక్ష్యం కొనసాగుతుందని, ఔట్సోర్సింగ్ ఉద్యోగులను రెగ్యులరైజ్ చేయమని కోర్టుల ఆదేశాలు ఉన్నా టీటీడీ యాజమాన్యం పట్టించుకోవడంలేదని, రెగ్యులరైజ్ ఆదేశాలు ఉన్నటువంటి అన్ని విభాగాల్లోని వారిని రెగ్యులరైజ్ చేయాలని, ఈ అంశాన్ని టిటిడి సమావేశం లో చర్చించకపోవడం సరైంది కాదని, టీటీడీలో కార్మికులకు సంబంధించి నెలకొని ఉన్న సర్వీస్ సంబంధిత అంశాలపై పరిష్కారం చేయాలని కందారపు మురళి ఆ ప్రకటనలో విజ్ఞప్తి చేశారు. భక్తులు, ఉద్యోగులు, యాత్రికులు, తిరుపతి-తిరుమల ప్రాంతాలలోని అభివృద్ధి, మౌలిక సౌకర్యాలకు ప్రథమ ప్రాధాన్యత ఇవ్వాలని కందారపు మురళి విజ్ఞప్తి చేశారు.
C.E.O
NEWS 24HOURS TV
Phone: 9290999316
